Jo niy je dobry krześcijōn. Mie religijo nigdy żodnyj siyły niy dowała, tōż niy widza jij za coś potrzebnego we swojim życiu. Mōm ale kamratōw, co im religijo ta siyła dowo, i niy mōm z tym żodnego problymu, a ôni sōm radzi, że ich niy ôcyniōm.

Moda na śmiōnie sie ze religije

Bo wiycie, ôd dugszego czasu je modnie sie śmioć z religije, a nojbarzij ze krześcijaństwa. „Haha, wierzić we jakigoś chopa”, „Haha, wielke krześcijańske Świynta, a wszysko sie ôd pogaństwa wziōnło”. Szteruje mie take coś. Jak by niy krześcijański liberalizm, to ludzie, co sie tak po tyj religiji ciepiōm, ôni by w życiu niy mogli tego robić. A jak ftoś niy wierzi, to niych sie pojedzie do Dubaju i na ulicy sprōbuje sie śmioć z wiary w chopa.

Toć, idzie sie ô siebie myśleć, że sie je wielki moderny człowiek, co go take bery jak religijo niy interesujōm, ale prowda je tako, że nasz systym wertōw cołki wyrosto gynau ś nij. Europejsko kultura je cołko zbudowano na krześcijaństwie i niy ma co udować, że je inakszyj. Bez to mōm rod Gody. Niy doś, że to je fajnie sie tak trefić ze familijōm, pojeś i pogodać, to jeszcze do tego sie biere udzioł we utrzimowaniu europejskij tradycyje.