Ftoś, fto wypisowoł te dyplōmy, ôn sie po prostu niy zastanowioł, ino szoł swojimi schymatami. Ludzko rzecz. A jednak niy było tak przijymnie, jak mogło być.
My, ludzie, mōmy tyndyncyjo do porzōndkowanio świata we schymaty i niy ma problymu, jeźli my sōm tego świadōmi. Gorzij, jak nasz cołki myślowy proces kōńczy sie na schymacie, a jeszcze gorzij, jak tyn schymat ani niy ma nasz. Wtynczos ino powtorzōmy frazy, co my je kejś usłyszeli, chocioż ich prowda pedzieć ani niy rozumiymy. (Ôddekuj Ślōnsk choby nigdy przodzij! Szrajbnij sie na nasz ślōnski newsletter: https://www.slazag.pl/newsletter-slaski)
We Metropoliji z wiynksza godōmy tak samo
Jedna ze takich bezmyślnie powtorzanych fraz to: „Niy ma jednego ślōnskigo, bo inakszyj sie godo we [miasto], inakszyj we [miasto], inakszyj we [miasto]”. Nojczyńścij te miasta to sōm jakeś trzi abo sztyry, co sōm zaroz kole siebie. Za tym nigdy niy idōm żodne przikłady, a wetna sie, że ôsoby, co to powtorzajōm, ani by niy poradziyły jakichś synsownych podać.
Jako może być rōżnica miyndzy ślōnskim jynzykym na Karbie, na Zowodziu i na Halymbie? Żodno. We Metropoliji z wiynksza godōmy tak samo. Trocha inakszyj sie godo w Piekarach i na Cidrach, kaj sie sycy, ale tyż niykōnsekwyntnie, bo niy idzie pedzieć bez przikłod „jo soł” abo „ze”, ino zawsze „jo szoł” i „że”. Jak sie rozchodzi ô słowa, to rōżnice niy ma żodnyj. Bo czymu by miała być, jak my sie sam miyszōmy ôd lot?
