Ôd poru lot we katowickim Kinie Kosmos idzie sie podziwać na filmy przetuplikowane na nasze. Kinomany z Katowic widziały już bez przikłod TopGun abo Terminatora 2. Tuplokowoł ich Grzegorz Kulik, za lektorōw robiōm znome szauszpilery ze Ślōnskigo Tyjatru, a kożdemu syjansowi towarziszy dyskusjo. Co jeszcze szłoby ôboczyć po naszymu w KInie Kosmos?
“Dioboł ôblyko sie u Prady”
Niy ma chyba bardzij kultowego filmu, kiery pokazuje launa lat dwatysiyncznych. Loty szczurôw, bycie durch na diecie i nojważniejsze - moda. A moda w filmie “Dioboł ôblyko sie u Prady” to niy ma bele jako moda. To je moda nojwyższyj klasy. Myśla, co kożdy Ślōnzok rod posłuchołby szumnego dialogu ô “cwitrze, co niy ma ino modry”.
“Potek”
Potka rod ôboczyłby kożdy. I nie idzie ô takigo potka co mo bezmała kożdy... ino ô Geszichta ôd familije mafiozōw. Stary Marlon Brando, kiery zmienił kino rolōm Dona Corleone. Mody Al Pacino co szumnie gro Michaela. I to jedno proste sōwko w tytule - “Potek”. To mo zocny klang…
“Chop ze szramōm”
Jak już my sōm przi Alu Pacino, to trza cosik perzieć ô “Scarface”. Ale tukej, wele Tony’ego Montany i ônego giwery, na piyrszy plan wyłazi Michelle Pfeiffer z jij modrym klajdym, kiero niy jednymu karlusowi śni sie bez noce.
“Wachtyrze Galaktyki. Tajla I”
No trza yntlich przetuplikować cosik ô superbohaterach. A na poczōntek nojlepij cosik dobrego. Terozki wiynkszość filmōw tyj zorty to sōm ino gerejty do robiynio piynindzy, bestoż ciynżko cosik fajnego znolyź. Skule tego wynokwili my taki, kiery idzie sie bez gańby ôboczyć. To co pociślibyście retować galaktyka ze Starlordym i ônego kamratami?
“Klachoła”
Toć. Niy ma to film, ino serial. Ale som my zicher, że intrygi modzików z Upper East Side godane po ślōnsku, rozpoliłyby lica kożdego ślōnskigo fana Klachoły. Wyforsztelujcie sie, jak Blair Waldorf cuzamen kamraci sie i wadzi z Serenōm van der Woodsen.
Xoxo, Klachoła…
