Nasi chopcy. Niy ma nadzieje do tyj polskości
Mie nic niy zadziwio pedzieć tak ô tych ludziach. Przeca u nos tak samo było: wziōnli nōm naszych chopcōw, rozwiyźli po Europie i przemusiyli sie prać. A jak by ôdkozali, to niy ôblecieli by niy ino ôni, ale tyż jejich familije.
Sekta polskości
Musza sie wōm prziznać, że jo dycki je trocha zbamōncōny tōm polskościōm, bo durch mi sie zdowo, że ôna idzie pōmału do przodku. A potym pora takich haji jak ta ze gdańskim muzeum, Wrocławskim Uniwerzytetym abo wrocławskim mostym i ta polskość zaś mi sie widzi za tako, co dō nij niy ma nadzieje.
Niy spokopcie mie źle. Niy rozchodzi sie ô polskość jako tako, ino ô ta polskość. Ta kōnkretno polskość, co zamiast być ideologijōm, co kludzi wszyskich do bycio dobrymi ôbywatelami Polski, ôna je quasireligijo, co ôczekuje padanio na pysk przed świyntymi bioło-czerwōnymi symbolami, a kożde ôdstympstwo we interpretacyji warszawsko-krakowskij historyje traktuje jak herezyjo. W kerym mōmyńcie dotrze dō nos, że ta forma polskości niy może być nazwano inakszyj aniżeli sekta?
Ôd prawyj do lewyj
A godōm, że niy ma nadzieje, bo jeźli szef jednego ze koalicyjantōw i rzecznik regyrōnku, co to bezma je tyn światły i uśmiychniynty, ôni majōm deferowania ô wystawa ô naszych chopcach, to kaj je plac na normalno polskość?
I niych mi żodyn niy godo, że to je jednostkowe. Jo sam pisza ino ô tych dwōch przipodkach, ale przeca moja swada ze fyministkami wynikła gynau z tego samego: z mojigo protestu przeciwko prōmowaniu tyj sekciarskij polskości. Dyrechtora Ślōnskigo Muzeum, Leszka Jodlińskigo wyciepła Platforma, jak jij sie scynariusz wystawy ô historyji Ślōnska niy widzioł, bo mioł pokozać ta historyjo z perspektywy lokalnyj, a niy zaś nastympno lzawo polōnocyntryczno hagiografijo. We 2014, jak Rada Europy wzywała polske państwo do dyjalogu ze Ślōnzokami, to polski regyrōnek, co za prymiera bōł w nim wtynczos Donald Tusk, ôdpowiedzioł, że „gwara śląska to dialekt języka polskiego, a Ślązacy to Polacy” i niy ma dyskusyje.
Polske mōzgi sōm tak przeżarte tym kultym polskości, że ludzie ôd lewyj do prawyj strōny go ani niy widzōm. Ci po prawyj strōnie sōm na tyn kult pyszni, robiōm i godajōm tak, żeby tego kultu brōnić. Mie sie to niy podobo, ale to je aby szczyre. Ale ci ôd cyntrum do lewyj, ôni ino z wiyrchu sōm tacy moderni i zachodni. Toć, przeszoł bez Syjm i Synat gezec ô uznaniu ślōnskigo jynzyka za regijōnalny, ale po tym, co ôni godajōm ô wystawie we Gdańsku, widać, że jejich myntalność sie niy zmiyniyła. Ôni sie ślōnski regijōnalny jynzyk dopisali do programu, bo wiedzōm, że wielaś ludzi dziynki tymu bydzie ich welować, a niy bez to, że ôni zaakceptowali to, że ftoś może w Polsce inakszyj patrzeć na świat.
