Piyrwszy roz mōg żech ôbrać prezydynta we 2010 roku. Po Smolyńsku Jarosław Kaczyński przeônaczył sie ze wilka na ôwca, isto myśloł, że sie niy spōmnymy, co to była ta IV RP. Wygroł Bronek Komorowski. Ujek z fōnsym, kiery niywiela poradził spokopić. Mono ô nim pisoł we 1996 roku w legyndarnym tekście “Nagrobek ciotki Cili” prof. Stefan Szymutku:
“Jak można było czuć się swojo wśród kontuszowych gości, jeśli za uroczysty strój nauczono uważać czorny ancug i bioło koszula”. Skuli “kontuszowego” Bronka a jego kamratōw (Maria Pańczyk-Poździej, Jan Miodek) do dzisio bajtle niy majōm godki we szkole.
Komorowski niy ino był wrogiym ôd jynzyka ślōnskigo, ale tyż ôd marketingu politycznego. Beztōż “przejechoł ciynżarno siostrziczka na pasach” i bez 10 lot mieli my Andrzeja Dudy za prezydynta. Lichego prezydynta - mamlasa, kiery pora razy sie ôpamiyntoł.
Cosik mi sie zdowo, że bydzie sie nōm za nim ćnić. Na dźwiyrze klupie Karol Nawrocki. Ftoś taki jeszcze niy zawitoł w naszym bestiarium politycznym. Kożdy dziyń media piszōm ô jego żywobyciu i kożdy dziyń jeżech corozki barzij wylynkany. Kibol, kiery kamraci sie z neonazistami. Wachtyrz, kiery strynczy baby. Prezydynt, kiery regiyrować bydzie fangōm. To je ajnfachowy chachar, kiery skludzi do Polski chacharstwo a jeszcze wiynkszo niynawiść.
Nawrocki to je kindernacjolista, kierymu robi sie gorko, jak rozprowio ô “wojokach wyklyntych” a inkszych fantazmatach pisowskij polityki historycznej. Wysłōchoł żech jego godki we programie “Wywiad z chuliganem”. Pedzioł tam ô historjii Ojropy Strzodkowej, że je “niyjednoznaczno”. Zarozki sie poprawił i pedzioł, że je “jednoznaczno”. Jednoznaczno? Szło by tak pedzieć naszym ôpom, kierzi byli we Wehrmachcie a naszym ujkōm zawartym we lagrach po 1945 roku?
Niy mōm rod, jak ftoś pisze, że tyn a tyn welunek je najważniejszy po 1989 roku. Dycki tak godajōm. I terozki jo tyż musza tak pedzieć. Fest sie lynkōm Nawrockiego, tego “Trumpa ze Stadionu Dzisynciolecia”. Beztōż byda welowoł na Trzaskowskiego.
Weluja na myńsze zło. Aby ôstatni roz!
