Co muszōm instytucyje zrobić
Lokalny regyrōnek
powiniyn powołać Instytut Ślōnskigo Jynzyka, żeby ftoś w kōńcu
mōg sie ôficyjalnie weznōńć porać dokumyntacyjōm ślōnskigo
jynzyka abo profesyjōnalnie ôrganizowoł wydarzynia dlo prōmocyje
jynzyka, take jak dyktaty abo inksze kōnkursy. Ze idyjōm powołanio
takigo instytutu wyszoł Ruch Autōnōmije Ślōnska i jo sie ś niōm
zgodzōm. Myśla, że do lokalnych regyrōnkōw na Gōrnym Ślōnsku
by to niy bōł jakiś ôgrōmny problym ôd financowyj strōny, a
jak by my mieli take ciało, to by my mogli sie lepij narychtować do
zmian.
Rada Ślōnskigo
Jynzyka musi durch robić nad kodyfikacyjōm jynzyka i rychtowaniym
materyji do rechtorōw. My jynzyk skodyfikowany mōmy kajś tak na 80
procynt. Toć, żodyn jynzyk niy ma skodyfikowany we stu procyntach
(Ani ô polskim tak niy idzie pedzieć, bo ôrtograficzno reforma, co
wejdzie na bezrok to je prawie jedyn ze krokōw kodyfikacyje polskigo
jynzyka), ale dobrze by było, żeby były zlikwidowane srogsze
niyakuratności, jake jo bez przikłod widza przi pisaniu po naszymu.
Ôgrōmno robota była wykōnano, jak sie rozchodzi ô materyje do
rechtorōw, ale myśla, że takich rzeczy nigdy doś. Trzeba tyż
weznōńć spōłpracować ze Instytutym Jynzykowyj Rozmajtości
Republiki (Instytut Różnorodności Językowej Rzeczypospolitej), co
bōł stworzōny we moju, i dojść do tego, jak ôn może pōmōc
ślōnskimu jynzykowi.
Na Ślōnskim
Uniwersytecie przidoł by sie w kōńcu możno aby Zokłod Ślōnskigo
Jynzyka abo piyrsze kroki ku ślōnskij filologiji. Je przeca wielki
czas na to, żeby ślōnski jynzyk porzōmnie badać i przekazować
swoja wiedza modszym pokolyniōm, a wybildowane na nim kadry już
hned bydōm fest potrzebne.
Robota do prywatnych
ludzi
Rechtorzi, co chcōm
kejś uczyć ślōnskigo jynzyka, niych niy przestowajōm czytać,
bildować siebie samych i pytać, jak co niy wiedzōm. Jo wiym, że
rechtōr łacnego życio niy mo, że programy sōm przeladowane, że
niyroz niy ma ani kedy sie weznōńć za siebie, ale tako jedna
strōna ślōnskigo tekstu dziynnie przed spaniym naprowda moc dowo.
To sie zresztōm niy ino tyko przeca rechtorōw, ale nos wszyskich.
Trza czytać po naszymu.
Przed nami wszyskimi moc roboty bez nojbliższy rok. Niy przemarnijmy tego czasu, żeby my byli na bezrok do porzōndku fertich na nowo rzeczywistość.
