Rewolucyjo na naszych ôczach
Jo sōm sie narodziōł zaroz po stanie wojynnym. Pado sie, że moje pokolynie miało analogowe dzieciństwo i cyfrowo modość, a rechtorzi musieli za naszych czasōw sie rozkroczać miyndzy filerym a kōmputrowōm myszkōm. Niy spodziywali my sie ale, że to wszysko nabiere takigo szwōngu, że dzisiej bydymy mieć w dōma masziny, co ône piytnoście lot tymu nazod były blank nowość, a dziś durch po prowdzie fungujōm, ale sōm zastarzałe.
Ale niy ino ô masziny sie rozchodzi. Jak by my sie cofli ô dwadziścia lot, to internet fungowoł ino na kōmputrze, co stoł w dōma. Dzisiej mōmy go durch we kabzi. Te dwadziścia lot tymu we internecie sie wszysko dopiyro ukłodało: były jakeś tam fora, było Gadu Gadu, były strōny. Dzisiej te strōny poradzōm być take rozbudowane, że idzie na nich cołke dokumynta pisać, finance ôd fiyrmy kludzić abo przekłodać ze polskigo na ślōnski.
A teroz na to wszysko nałożyła sie sztuczno (a możno kōnsztowno?) inteligyncyjo. Te wszyske rozmajte zerwisy, co poradzōm napisać wypracowanie abo wygynerować ôbrozek, to je ino kōncek tego, co pōmału wchodzi do naszego życio.
Ślōnzocy ôstowajōm ze zadku
Moc mie turbuje to, że cołko ta rewolucyjo ery internetu i sztucznyj inteligyncyje, ôna postympuje jakoś tak naôbkoło naszego jynzyka i kultury, ale we postrzodku ślōnskigo ruchu niy ma co modernyj myśli szukać. Rozmajte grupy naôbkoło nos mogōm godać do maszin, a te ôdpowiadajōm we jejich włosnym jynzyku, a u nos nojwiyncyj, co ftoś poradzi zrobić, to po setny roz wrazić sie na strōna lista ślōnskich słōwek.
Do tego jak ftoś coś chce ôpublikować, to to robi na papiōrze. Mōmy dostymp do takich paradnych technologiji, a jedyne ôsoby, co poradzōm je wykorzistać, to tak naprowda Stanisław Neblik, co ôd lot buduje swōj internetowy Dykcjōnorz, i jo ze swojim Sillingym. Spōmino mi sie jedyn chop, coch mu ze ôziym lot tymu nazod pokozoł darmowy program do jynzykowych korpusōw. Ôn sie na podstawie tego napisoł i wydoł papiōrowo (wiadōmo) ksiōnżka, a niydowno pokazowoł zopisy ekranu ze jakigoś swojego dōmowego korpusu. Tyn program już dwa abo trzi razy bōł aktualizowany, a chop durch siedzi nad tōm wersyjōm sprzed ôźmiu lot, bo poradzi ino powtōrzić to, co mu sie pokoże, nic wiyncyj.
Tyn brak technologicznyj kreatywności we tym naszym małym światku to niy ma coś, z czego by sie szło śmioć. Reszta świata bydzie gzuć ze technologijōm coroz warcij, a my, jeźli sie niy ôbudzymy, to zaroz bydzie pō nos.
