Robert Przeliorz recenzuje: Familijo podług Renault Espace VI

Idzie sie wejrzeć w kożdo ksionżka reklamowo, dowolnyj marki aut i sam kożdy może zoboczyć jak dzisiej wyglondo oferta pojazdōw. Kaj ino wejrzeć to ino te nasterydowane choby szpryca w rzyć dostoły SUVY, crossovery i inaksze wymysły szalonego blachorza. Marki godajom, że takie auta to je wyjście do tego o co się rozłazi klientom. No dyć niy można sie na to nabrać, bo tak samo jak sie wyłazi do klientōw, tak sam kreuje sie to co je modne.

Tak sam my stracili roztomajte VANy, kompaktowe kombi i wiela inakszych. No ja, we miastach je moc borsztajnōw i dziur, beztoż niby SUV lepszy, ale jak wlecisz w dziura swojom 20-calowom felgom ze aluminium, to jesteś pora tauzenōw geltu do zadku. No ale producent sie cieszy.

Na szczyńście pora aut ôstało kaj jeszcze wrazicie 7 osōb. Może to niy je pojemność choby Forda Galaxy, ani praktyczność Scenica 3, ale dalej je to odpowiedź na potrzeby familyj. Bohaterem dzisiej bydzie Renault Espace VI generacyji.

O aucie

Renault Espace to je blank historia VANōw. Od piyrwszej do trzeciej generacyji, te auta to boły blank VANy. Moc miejsca, praktyczność, dobre motory - idealne kajś na daleko rajza. Od czwartyj odsłony to boł już crossover, a dzisiej to je SUV. Testuja auto, kere już przeszło piyrwszy facelifting. Na samym przodku boł trocha inakszy przodek auta i niczym niy rōżnił sie od krōtszej wersji pod nazwom Austral. Dzisiej wszyjskie SUVy klasy średniej wyższej ze stajnie Renault majom przodek, kery ôstoł zaprojektowany dla Rafale (jak ktoś z wos zoboczył, że to je podobne do Peugeota to mo recht - projektant przelozł ze Stellantisa do Renault).

Espace mo ta rōżnica, że je trocha dugszy od Australa i mo przeprojektowany tył, tak aby do zadku wlozły jeszcze dwie osoby. No i to niy ma co godać, to niy som miejsca wygodne ino takie awaryjne place na krōtko rajza (ino kombivany abo Dacia Jogger dajom pełnoprawne place we trzecij raji). I teroz jakby postawić obok Scenica 3 co boł o klasa niżyj od Espace’a i dzisiejszo jego wersyjo, to Scenic 3 bije na gowa praktycznościom wiynkszego bracika (a już niy godom o wcześniejszych wersjach Espace, bo to przepaść). Lecz tu niy o to sie rozłazi, a o trocha luksusu.

A auto robi wrażenie. Moc detali, ostre linie, spojrzenie wkurzonego sztajgra - kej sie wejrzy we zdrzadło i zoboczy, że z zadku ciśnie tako fura, to oroz chce sie zjechać na prawo i zrobić plac. Do tego lampy matrycowe led po ćmoku robiom fest robota i niy idzie tego auta pomylić z inkszymi.

Postrzodek

We postrzodku auto jest moc luksusowe. Same nojlepsze materiały (no dobra, piano black je o rzić trzasnońć). Na zicach skóra, dźwierza z mientkich tworzyw, nagłośnienie od Harman/Kardon. Na piyrwsze wrażenie je sztos. Zice mo fest wygodne, elektrycznie szterowane i bez ekran możno zapamiyntać pozycjo. Trocha na przodku może być kłopot, bo auto do wysiodanio odjeżdżo tyn zic do zadku, a po powrocie trocha niyspodziewanie zaś zmiynio pozycjo, ale idzie sie przyzwyczaić.

Deska rozdzielczo to je pokoz nowoczesności. Momy tukej dwa ekrany - jeden na zygory i inaksze informacyje, kery można sie przestowiać zgodnie z tym kere informacyje chcemy mieć non stop podczos rajzy. Do tego momy zmieniarka trybōw na kierownicy, kero oprōcz specyfiki jazdy zmiynio kolory ekranu i oświetlenio postrzodka. Drugi ekran zaś to je rozbudowany system R-Link, kery je robiony bez Google. I to je całkiem dobry kierunek, bo system je stabilny, niy zacino sie i świetnie wspōłpracuje ze Android Auto.

Do tego jak mosz Youtube Music Premium, to możesz bezpośrednio szterować muzykom z ekranu. Co zasługuje na dodatkowo pochwała - od klimatyzacyje momy normalne knefle (a teroz to niy je takie oczywiste, bo momy pora przykłodōw, że trzeba bez ekran sie przeklikiwać co by sie temperatura zmienić, a to wygodne niy jest).

Ponadto momy moc schowkōw - przed pasażerem, w konsole środkowej z ładowarkom indukcyjnom do mobilnioka, na napoje, pod łokciym.

No niy je to downy Espace, kery mioł te schowki kaj ino sie doło, ale wiadomo jak je. W drugiej raji zicōw je moc placu. Już niy ma trzech oddzielnych zicōw, a je dużo kanapa, ale przesuwno. To daje trocha opcji ułożenia i abo idzie zrobić wiynkszy bagażnik, abo zrobić trocha placu na nogi tym we trzecij raji, abo idzie sam je przesunąć moc do zadku co by we drugij raji ludzie mogli sie nogi wyprostować.

Jo je chłop 191 cm i godom wom, że miejsca na moje nogi boło doprowdy dużo. Na szerokość ino jest słabo, bo dwa foteliki powodujom, że placu dla trzecij osoby niy ma praktycznie żodnego. Trzeba fotelik doć na na środek, co by ktoś jeszcze wloz od strony dźwierzy a na środku nie ma isofixa. Po środku je skłodany podłokietnik ze miejscami na napoje, we dźwierzach som miejsca na roztomajte hamozie. Niy ma już stolikōw w oparciach przodnich zicōw, ino som siatki na cajtungi (foto dzisiej czyto papierowe cajtungi? Na pewno niy wy teroz). Na zadku środkowej konsole som dwa gniozda USB-C i nawiewy, ale bez panelu szterowanio tymperaturom.

We trzeciej raji… No som dwa zice, ale ino awaryjne. Bajtel abo nastolatek tam wlezie, ale dorosły już bydzie mioł kłopot tam wlyźć (no że chyba niskorosły dorosły to wlezie), a wylyźć jeszcze gorzyj, bo z niedokrwienio może nie czuć szłapōw. Ale jak już ktoś tam bydzie to mo pora udogodnień jak plac na flaszka czy nawiew. Trasa z Gliwic do Sosnowca powinien przeżyć.

Cołko kabina je spiynto bez dach Solarbay, kery pełni funkcyjo szklanego dachu, ale niy je to klasyczno szyba. To cołkiem złożono technologia, w kerej użyto specjalnej folie, wrażonyj miyndzy dwie szyby. Po dostarczeniu sztromu zmiynio sie orientacja ciekłych kryształów i bezto szyba sie robi mleczno a izoluje od promieniowanio słonecznego. Można sie go ustowiać albo w całości, abo w dowolnej połowie, abo wcale. I musza pedzieć - działo. Idzie odczuć różnica w gorkie dni, kiej klara daje z pełnom mocom.

Bagażnik jak złożycie place w trzecij raji mo kajś kole 600 litrōw, a jak wszyjskie place złożycie to wylezie kajś kole 1800 litrōw. Jo spakowoł cołko familija (2 dorosłych, a trzi bajtle) na tydzień wakacji. Bagażnik boł załadowany po dach, ale zmieściłech sie ze wszyjskim, także funkcjo spełnił. Mom ino takie zastrzeżenia co do akustyki we tym aucie, bo w postrzodku jak sie kajś szyba spuści z zadku to pojawio sie takie irytujonce dudnienie. Niby je cicho w aucie i z placu niy słychać tak larma, ale wygłuszenie je chyba przesadzone (może niy jestech obiektywny, bo bajtle mi robiom larmem z gowy sieczka).

Motor

Jak dźwigniemy maska to zoboczymy benzynowy motor 1.2 turbo plus moc kabli, bo je to hybryda. Niy byle jako, bo na papierze mo dwiesta koni. I je to motor specyficzny. Jak na tako buda to to sam ciśnie i osiongi mo dobre. Jeździłech wcześniyj Rafale z tym samym motorem i musza pedzieć, że bez rok niy zmieniło sie wiele. Renault godało, że coś tam poprawili, ale różnica je minimalno. Wyniko to ze specyfiki napendu. Je to hybryda HEV czyli klasyczno, bez ładowanio z gniozdka. Przy 120 km/h kiej mom pedał gazu wrażony w zol, na dosłownie chwila auto sie tak zacino, a potem już ciśnie. Rozłazi sie chyba o to, że dochodzi do jakiegoś rozpiyncio abo spiyncio napyndóōw, a przy wysokich obrotach musi tako przerwa nastompić. Abo kwestia skomplikowanyj skrzynie. Niy wiym - rozmyślom. Auto je ograniczone do 180 km/h, ale po co wiyncyj? Jerona, chopy a baby płaczom we necu, że zło Unia zabiero nom motoryzacja, wolność a inksze roztomajte dupczenie flekōw. To je sam rozsondek i znajomość fizyki. 140 km/h to doprowdy wysoka pryndkość i na autobanie styknie. Tyn przedział 140-180 to zapas mocy, co może ino ostać do jakijś potrzeby wyprzedzanio, co by mieć czos pitnońć ze sztresujoncej sytuacje.

W tym motorze rozłazi sie o coś innego - spolanie. Jak sie jeździ we granicach rozsondku (pryndkość do 120 + technika jazdy), to bez problemu mogecie zrobić do tauzena kilometrōw na jednym tankowaniu. Na prowdy. Jak bydziecie tego używać ino w mieście i bedziecie dobrze szterować naładowaniym baterie a rekuperacjom to wynik może być jeszcze lepszy. Na Ślonsku to przy noszej specyfice dróg to ino na korzyść dla bajtlika, a na tanksztela wiyncyj bedziecie włazić po bonkawa niż po paliwo. Ino niy na hot-dogi, bo bedziecie rubi jak Kompanio Wynglowo.

Rajza

Tym autem idzie jechać bez cołki dzień. Na prowdy, moc asystentōw daje poczucie, że jest to prawie jazda autonomiczno. Renault zrobiło taki knefel, kery wyłonczo wiynkszość asystentōw, kere mogom być irytujonce, ale ôstały wprowadzone jako obowionzkowe wyposażenie w Europie. Dużo wygody w użytkowaniu.

Auto je przemyślane pod kontem właśnie tego jak sie spyndzo w nim czas. System multimedialny potrafi czytać wiadomości (i tukej informacyjo dla niewiernych chopōw a babōw - muszecie wyłonczyć Bluetootha, bo jak ftoś wom wyśle wiadomość że zrobioł by z wami to co zrobiła polsko administracyja z Bytomiem, to cołko familia sie o tym dowie). Ale ostatecznie to niy je zła funkcjo. Zawieszenie je pewne i zachowuje balans pomiyndzy komfortym a pewnościom prowadzynio. To je bardzo ważne we autach, kere użytkuje sie na codzień, ale kompromisy wymagajom ofiar.

Trocha ciepie jak wjedziecie na poprzeczne nierōwności. Może to też wina wielgich felg, ale to auto woli prosty asfalt. Poza tym widoczność z postrzodka je znakomito i musza sie jeszcze porozpływać nad tymi reflektorami LED. To je coś na co warto sie zadłużyć. Kosztujom 4 tauzeny nawet w nojwyższej wersyje wyposażynio, ale godom wom warto. Warto bezto, że w nocy mocie cołkie pole widzenio. Świetnie doświetlone pobocze, asystent dugich świateł i automatyczna możność wycinanio z pola świecenia aut z naprzeciwka sprawio, że niy oślepiocie inkszych kierowców niy traconc nic na oświetleniu drogi. Znakomite.

Podsumowanie

Tukej dołażemy do sedna problemu - wiela za to trzeba zapłacić geltu? No i tukej… Nojtańszo wersja “techno” sztartuje od 193 tauzenōw złotych. Dużo? No trocha. Schody sie robiom jak bydziecie chcieli wersja tako pod frup “iconic”. Tukej ze wszyjskim wylezie wos to prawie 237 tauzenōw i zaczyno sie pojawioć zwontpienie czy za romb na masce trzeba tyla płacić? Niy jestech kompetentny ôdpowiedzieć na to pytanie, bo jestech subiektywny.

Jo z Renault sie lubia od bajtla, bez mojego somsioda. To właśnie ta marka wyłazi na francuskiego a europejskiego lidera i widza jaki progres zrobili bez lata. Oni som już tak trocha pōł-premium. Może niy je to BMW czy Audi (ale na tle ostatnich wpadek jakościowych Audi to Niemce sie mogom schować przed Renault), ale to już poziom jakości i inakszego myślenia o motoryzacji. Można pedzieć "francuskie Volvo". No i je produkowane w Europie, co je w istotcie ważne w erze zaciepanio Europy chińskimi autami. No ale sam Espace to je bezpośrednio konkurent takich aut jak Skoda Kodiaq abo jej bracik VW Tayron. No i tam cenowo niy jest lepiej, ale jest wybōr motorōw, jeszcze idzie kupić diesla i napynd na cztery koła, a tego u Renault niy ma.

Je za to zupełnie inksze myślenie jeśli chodzi o użytkowanie auta, kere jak sie za chwile okaże, bydzie bezcenne. A czy nadowo sie do familyj jak downiyj VAN-y? Niy jest to wōł roboczy i nie wszyndzie wrazicie hasie abo roztomajte hamozie. W trzecio raja niy wlezom majoryntni, niy ma żodnego telewizora kajś zogówkach.

Jest za to kompromis miyndzy funkcjonalnościom a tym co by mieć jakiś poważny wizerunek. To je auto dla kogoś fto wczas rano podjeżdżo pod biurowiec bez gańby, a popołedniu spyndzo czas z familijom tyż bez gańby. Do nowoczesnego Ślonzoka pasuje idealnie.