Mało fajnyj ślōnskij kultury
Niy ma sie co ôszydzać: jak sie wejzdrzi na estetyka naôbkoło ślōnskij kultury, to ôna czynsto mo swoje felery. Wizualne rōmy tyj naszyj kultury to niyroz abo ludowe mustry, abo belejakość. We muzyce mōmy abo szlagry i śpiywanie do szpasu, abo ekstra ambitne kōncki. Mo sie poczucie, że my niy mōmy grajfki do fajnyj modernyj estetyki.
Stōnd sie wziōn nojprzōd tyn przekłod „Kung Fury”. To je pastisz amerykańskich filmōw ze 80. lot, tōż niy brakuje w nim ôdwołań do stylu zachodnigo świata tamtych czasōw.
Ślōnski jynzyk i neōn-noir
Już żech kejś spōminoł, że fest mie ciekawi cyberpunk. Niy ino skirz tego, że ôn stawio moc aktualne pytania ô ludzko natura, ale tyż bez to, że mo gynau tyn swōj ekstra styl.
Prowda pedzieć niy wiadōmo czymu, ale we kożdym cyberpunkowym świecie durch je ćma i leje dyszcz abo prawie przestało loć. Przi tyj ćmie ulice sōm zatopiōne we świetle neōnōw, co majōm rozmajte farby. To je estetyka, co sie dzisiej moc podobo i połno ludzi niy ustowo jij szukać we richtich świecie.
